開學啦!

參加咗鴨作人Jaycee和大佬貓Jay發起嘅"開學啦"場景活動, 一於努力整整砌砌, 將之前整好嘅場景框框變做課室, 先俾大家睇吓開學嘅情況先啦 :

開學前一日, 課室乾乾淨淨等一班小朋友嚟返學, 究竟呢一間係咩學校呢??

開估啦.....原來呢間係國際學校小學部。放咗一個悠長暑假, 大家返到學校一見面就急不及待分享一吓暑假嘅喜與樂.....

四葉妹妹仲帶埋茱拉魯敏一齊返學..

老師嚟啦! 大家都乖乖地坐定定準備上堂

大家第一日返學都精神奕奕, 好開心..

 

睇真啲.....原來已經有小朋友開始恰眼瞓啦, 相信一定係暑假每日都瞓到好晏, 一時間唔慣早起床啦! 四葉妹妹驚呢位同學仔恰眼瞓俾老師發現, 所以即刻拍醒佢!

製作花絮 :

之前都有提過為開學前準備, 做咗啲書仔 :

裝修課室 :

製作書包仔 :

後記 : 

今次都算係第一次自己一手一腳整場景, 除咗書枱櫈係模型之外, 其他都係DIY, 由於唔係太多時間, 所以手作仔唔係好多。我呢個場景相信一定唔夠其他blog友仔做得咁靚, 不過志在參與, 亦都好enjoy整個製作過程。

大家可以喺以下途徑參觀到其他blog友仔嘅作品架 :

https://www.facebook.com/events/351981978260311/?ref_dashboard_filter=upcoming

第一次DIY場景(預告篇)

受到咁多喜歡玩玩具嘅blog友仔感染及鼓勵(特別多謝小屋), 我都終於踏出DIY場景嘅第一步啦!

因為第一次整, 所以想盡量簡單啲 (因為諗得太複雜我怕會中途放棄呀! 哈哈), 就由幾塊木板開始入手....其實我都唔知道應該用咩木開始, 但諗到外牆應該要堅固啲, 所以就買咗幾塊比較硬嘅木 (後來有少少後悔, 因為太硬, 唔可能界開整隻窗)

由於一直都好想整一間和屋, 所以周圍搵吓啲和式家品, 大家覺得呢張蓆點呢?

雖然未完成, 但都想放啲嘢上去睇吓效果先....發覺原來呢個日式暖爐枱太大, 霸晒間屋仔

不過都想俾四葉坐吓呢間"新屋"先...睇佢幾開心! ^_^

俾四葉玩完一輪之後, 又要開始繼續改造....加咗個門口, 感覺好好多..

加埋牆紙...不過手工有待改善 (嘻嘻)

呢間屋仔之後究竟會變成咩樣呢?? 依家仲係一個謎 (連我自己都未知)....希望可以快啲開估俾大家欣賞啦!

"秋葉姐姐"粉墨登場! (Azone公仔)

之前提到喺日本買嘅Azone公仔肢體, 終於都合併兼點睛啦!  我幫佢改咗個名做"秋葉", 原因係佢喺秋葉原買, 再加上同四葉妹妹一樣可以有個"葉"字, 嘻嘻...

買嗰陣, 我揀咗個啡金色頭髮嘅頭, 因為我鍾意呢隻色嘅頭髮....佢把頭髮真係好...長....架!

開始點睛前, 我將啲眼影咗印, 再比較一下大眼同細眼嘅分別, 大家覺得邊對眼靚啲呢?

登登登登~~點睛完成! 除咗藍色眼, 其實仲有其他色, 所以我冇用膠水貼實, 只用咗水臨時貼, 咁下次我就可以換其他眼再玩啦!

呢套和服係有一日行12蚊店時買, 買嗰陣都未砌好秋葉架, 不過覺得套和服好靚, 所以就買咗先啦, 結果......

原來套和服勁啱秋葉呀!  完全好似度身訂做咁, 所以秋葉都著得好開心呀!

秋葉: 我係咪好有日本妹feel呢?? こんにちわ~

做完日本妹, 秋葉當然要做番一個潮人啦! 呢套衫係買秋葉時同時買, 當時都唔識分啲衫嘅size, 好彩啲店員好好人, 見我揀錯size都有話我知, 如果唔係相信買錯啲衫仔囉...

衫﹑裙﹑鞋都係散買, 係我自己襯架, 我最鍾意就係對boot.

呢兩張櫈都係12蚊店嘅產品, 買嗰陣純粹貪得意, 估唔到個size咁fit秋葉.

大家睇吓秋葉幾歎.....呵呵.. (杯啤酒係扭蛋, size大咗少少)

後記: 遲啲會幫秋葉修吓啲頭髮

又要介紹吓新入嘅玩具啦!

6月中去咗一轉東京旅行, 買咗好多玩具, 直到依家先有時間整理一下, 等我同大家介紹吓啦:

呢3個係壽屋出嘅公仔, 其實我對呢幾個公仔一啲都唔認識, 喺秋葉原嘅Kotobukiya(壽屋)店入面見到佢地, 由於最近真係愛上咗啲手腳關節可以郁嘅公仔, 所以就俾佢地吸引住帶咗返嚟啦!

拆咗其中一個嚟睇, 原來佢地對腳有磁石, 可以磁住企喺塊地台上, 企得好穩陣, 每一個公仔都跟一塊地台。

睇到呢張相好似有啲嚇人, 肢體? 哈哈....其實呢一個係azone公仔嚟, 因為想有一個獨一無二嘅azone公仔, 同時又想平平地玩吓, 所以就散件咁買, 要搵時間幫佢"點精"同剪番個靚髮, 到時再分享俾大家睇啦!

呢個太鼓達人鼓係買俾四葉妹妹嘅"手信"! 之前其實喺香港見過, 但唔捨得買, 去到東京又俾我見番佢, 既然咁有緣, 於是就....呵呵! 四葉妹妹未知有新玩具玩架!

去到日本當然要掃一下森林家族產品啦, 其實呢啲香港都有, 不過撞啱日本百貨公司做特價平啲, 所以就喺嗰邊買啦!

呢個風之谷模型我一直都好鍾意, 事關實在太鍾意呢套動畫啦! 之前一直都冇買, 因為要自己上色, 怕handle唔到, 但估唔到今次喺日本見到, 就雄心壯志帶咗返嚟, 唔知幾時先的起心肝砌呢? 哈哈...

呢盒鬆弛熊re-ment係去完日本返嚟喺香港買, 本來想喺日本買re-ment, 但原來嗰邊反而冇香港咁平, 所以返嚟就買番。

呢3盒1/12系列都喺秋葉原買, 其中左手邊嘅係新出, 希望有機會整到場景可以用啦。

去到日本, 心血來潮想買日文漫畫, 雖然唔識睇, 但希望擁有全日文嘅書, 所以揀咗我嘅至愛--風之谷, 四葉妹妹。

下面呢幾個都係喺日本扭嘅扭蛋 :

跟住落嚟嘅玩具都係之前喺香港買嘅不過一直都無post出嚟 :

好鍾意呢間大屋, 係喺復活節時喺玩具反斗城買, 因為鍾意有停車場, 但到依家都未拆出嚟玩...收藏 ing...

由於時間關係, 所以今次一次過post晒所有近期入嘅玩具出嚟, 好希望遲啲可以逐一影多啲相同埋砌到場景呀!